28 июня.

Канон преподобному Ефрему, Патриарху Сербскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Патриа́рхов вели́кое удобре́ние,/ святи́телем красото́, мона́хом пра́вило,/ пусты́нником сла́ву, ми́лости пода́теля,/ разсужде́ния свети́льника,/ соше́дшеся, ве́рнии, восхва́лим,/ кро́тости учи́теля, Боже́ственнаго рачи́теля,/ прему́драго архипа́стыря, вели́каго святи́теля и отца́,/ Ефре́ма, Патриа́рха Се́рбскаго,/ звезду́, те́мныя лю́ди просвеща́ющую/ и вся ве́рныя озаря́ющую./ Те́мже, притека́юще к ра́це моще́й его́,/ любо́вию целу́ем я и вопие́м:/ свя́те святы́й, непреста́й моли́ти Христа́ Бо́га/ спасти́ся душа́м на́шим.

Кано́н, гла́с 4.

Пе́снь 1.

Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Припев: Преподо́бне о́тче Ефре́ме, моли́ Бо́га о нас.

Боже́ственным за́поведем Христо́вым от ю́ности, о́тче, рачи́тель быв,/ сих зако́н свет стезя́м твои́м положи́л еси́,/ ду́шу свою́ Тро́ицею озари́в./ Те́мже, святи́телю, моли́ся, ум мой просвети́ти,/ усе́рдствующа похвали́ти святу́ю па́мять твою́.

Припев: Преподо́бне о́тче Ефре́ме, моли́ Бо́га о нас.

В ю́ности ста́рческую му́дрость дарова́ тебе́ Христо́с,/ усе́рдно Того́ вожделе́вшу,/ и Сего́ оправда́ния и словеса́ соблюда́я па́че вся́каго бога́тства,/ жите́йская пренебре́гл еси́,/ те́мже тебе́ обогаща́ет пребыва́ющим во ве́ки.

Сла́ва Отцу́ и Сы́ну и Свято́му Ду́ху:

Я́ко апо́столом единонра́вный и преподо́бным изве́стное пра́вило,/ архиере́ом же Боже́ственное удобре́ние,/ ни́щим и оби́димым ми́лователь и засту́пник,/ о́тче всеосвяще́нне Ефре́ме, ты был еси́.

И ны́не и при́сно и во ве́ки веко́в. Ами́нь.

Богородичен: Я́ко во утро́бе Свое́й прие́мши Огнь Боже́ственный, Пренепоро́чная Ма́ти Бо́жия,/ росо́ю Твоего́ милосе́рдия попали́ страсте́й мои́х те́рние,/ я́ко да в тишине́ безсме́ртия Твоего́ Сы́на и Бо́га моего́ прославля́ю.

Пе́снь 3.

Ирмос: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Припев: Преподо́бне о́тче Ефре́ме, моли́ Бо́га о нас.

Жела́нием разжиза́ем к любви́ Боже́ственней,/ в пусты́ню пости́гл еси́, я́ко в приста́нище невла́емо,/ иде́же тве́рдым по́двигом страсте́м те́рние посека́еши/ и, се́мя духо́вно в души́ свое́й, я́ко земля́ плодоно́сна, прие́мь,/ напита́еши благочести́выя ду́ши а́нгельским хле́бом словесе́ Бо́жия.

Припев: Преподо́бне о́тче Ефре́ме, моли́ Бо́га о нас.

Незави́стно свои́ми поуче́нии/ единообра́зных мно́жества наста́вил еси́ к Небе́сней стези́/ и, ко гра́ду у́мному сих возводя́,/ сам себе́, о́тче, о́браз сим предлага́еши.

Сла́ва Отцу́ и Сы́ну и Свято́му Ду́ху:

На вели́це престо́ле сел еси́ я́ко досто́ин святи́тель,/ смире́нием Бо́га просла́вил еси́, Ефре́ме,/ и всем откры́л еси́ неги́бнущее бога́тство,/ я́ко благоче́стия пропове́дник прекра́сен и Тро́ицы сосу́д честне́йший.

И ны́не и при́сно и во ве́ки веко́в. Ами́нь.

Богородичен: Тебе́, ро́ждшую вся́ческим Творца́,/ я́ко и́стинную Бо́жию Ма́терь, совоку́пльшу к Себе́ преподо́бных мно́жества, мо́лим:/ моли́ся утверди́тися умо́м на́шим в любви́ Сы́на Твоего́ и Бо́га на́шего.

Седа́лен, гла́с 1.

Житие́ свое́ доброде́тельми, о́тче, уясни́в,/ па́че ума́ блаже́нству сприобщи́ся,/ в телеси́, я́ко А́нгел, пребыва́я невеще́ственен/ и безстра́стным соверше́нством осия́емь,/ светови́дною соде́ла свою́ ду́шу,/ те́мже к ре́вности А́нгельскаго жития́ и́ноков мно́жества наста́вил еси́./ Сего́ ра́ди тя, я́ко преподо́бным украше́ние и святи́телем сла́ву, воспева́юще, ублажа́ем.

Сла́ва, и ны́не, Богородичен:

Наста́ви нас на путь покая́ния,/ укло́ншияся к безпу́тию и Преблага́го Бо́га прогне́вавшия, Неискусобра́чная Благослове́нная Мари́е,/ прибе́жище отча́янным челове́ком, Бо́жие вмести́лище.

Пе́снь 4.

Ирмос: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Припев: Преподо́бне о́тче Ефре́ме, моли́ Бо́га о нас.

Доброде́телей Боже́ственное сокро́вище в се́рдце свое́м сниска́л еси́ –/ би́сера, Пресве́тлаго Христа́,/ отню́дуже раздая́л еси́ незави́стно к тебе́ приступа́ющим те́плою ве́рою,/ я́ко учи́тель Правосла́вныя ве́ры и побо́рник тепле́йший.

Припев: Преподо́бне о́тче Ефре́ме, моли́ Бо́га о нас.

Я́ко и́стиннаго любому́дрия рачи́тель,/ всему́ своему́ житию́ сожи́тельницу смире́нную па́мять стяжа́л еси́,/ сего́ ра́ди, я́ко водо́ю живо́ю, сле́зными исто́чники пла́мень страсте́й угаси́л еси́,/ к безсме́ртия земли́ приходя́щих к тебе́ предводя́.

Сла́ва Отцу́ и Сы́ну и Свято́му Ду́ху:

Ми́лости сподо́бися, преподо́бне,/ И́же ми́лости ра́ди мно́гих на земли́ стра́нствовавша,/ я́ко Сего́ за́поведей храни́тель, ко всем ми́лость простира́я./ Те́мже и ны́не моли́ся, святи́телю преблаже́нне,/ я́ко да обря́щем ми́лость от Христа́ в День су́дный.

И ны́не и при́сно и во ве́ки веко́в. Ами́нь.

Богородичен: Прама́терний долг разреши́ла еси́, Всепе́тая,/ ро́ждшая Сло́во Пребезнача́льное, Еди́наго от Тро́ицы,/ во две во́ли, еди́ном же соста́ве,/ Сего́ моли́, Отрокови́це Пречи́стая,/ мои́м согреше́нием оставле́ние дарова́ти.

Пе́снь 5

Ирмос: Ужасо́шася вся́ческая/ о Боже́ственней сла́ве Твое́й,/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Припев: Преподо́бне о́тче Ефре́ме, моли́ Бо́га о нас.

Прини́кл еси́ в глубину́ Боже́ственных писа́ний/ и отту́ду благода́ть Ду́ха поче́рпл еси́,/ я́ко к ча́ши прему́дрости, преподо́бне, устне́ свои́ приложи́в,/ ра́зум Боже́ственный всем, о́тче, откры́л еси́,/ я́ко таи́нник ви́дений духо́вных де́йственный.

Припев: Преподо́бне о́тче Ефре́ме, моли́ Бо́га о нас.

Не на песце́, Богому́дре,/ но на тве́рдом основа́нии духо́вную свои́х доброде́телей хра́мину поста́вив,/ твои́м кре́пким по́двигом и терпе́нием/ вра́жиих сете́й ловле́ния, я́ко паучи́ну, расто́ргл еси́.

Сла́ва Отцу́ и Сы́ну и Свято́му Ду́ху:

Свяще́нства оде́ждею и чи́стыми богови́дении светле́йшую свою́ ду́шу просвети́в,/ Пребоже́ственней Тро́ице сию́ сотвори́л еси́ оби́телище,/ ста́до свое́ науча́еши, преподо́бне, лихои́мства огреба́тися,/ сребролю́бия же лесть свои́ми словесы́ устрели́л еси́.

И ны́не и при́сно и во ве́ки веко́в. Ами́нь.

Богородичен: Я́ко одушевле́нный Бо́жий киво́т,/ Богоро́дицу вси воспои́м, я́ко на́шу наде́жду и к Бо́гу Хода́таицу,/ моля́щуюся приле́жно спасти́ся от сете́й вра́жиих душа́м на́шим.

Пе́снь 6.

Ирмос: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Припев: Преподо́бне о́тче Ефре́ме, моли́ Бо́га о нас.

Трича́стныя си́лы душе́вныя Боже́ственною му́дростию, о́тче, окорми́л еси́:/ слове́сную – пра́вдою и му́дростию,/ я́ростную же – му́жеством кре́пким,/ жела́тельную же – целому́дрием, блаже́нне,/ и́хже в житии́ ничто́же потре́бнее.

Припев: Преподо́бне о́тче Ефре́ме, моли́ Бо́га о нас.

Мо́ре страсте́й пресека́еши, я́коже Моисе́й вели́кий,/ и фарао́на мы́сленнаго, и́же есть грех мучи́тель, удави́л еси́;/ христоимени́тыя лю́ди приво́диши, блаже́нне, к земли́ безсме́ртия,/ па́губнаго же Амали́ка, си есть тлетво́рная мне́ния, смире́нием побива́еши./ Те́мже не преста́й моли́тися, святи́телю,/ спасти́ся ста́ду твоему́ от душепа́губных мы́слей и жела́ний.

Сла́ва Отцу́ и Сы́ну и Свято́му Ду́ху:

Я́ко на колесни́цу четвероко́нную возсе́л еси́, свяще́нне,/ Боже́ственными доброде́тельми, прехожда́я к Боже́ственным селе́ниим/ и низлага́я ду́хи лука́вства всегда́шним к Бо́гу зре́нием.

И ны́не и при́сно и во ве́ки веко́в. Ами́нь.

Богородичен: Ра́дуйся, Вы́шняго освяще́нное селе́ние,/ Тобо́ю бо ра́дость даде́ся, Богоро́дице, вопию́щим:/ благослове́нна Ты в жена́х, Пренепоро́чная Влады́чице.

Конда́к, гла́с 8.

Я́ко благоче́стия учи́теля прекра́снаго/ и архиере́ом первопресто́льника прему́драго,/ и́ночествующим наста́вника и пра́вило,/ церко́вная ча́да, соше́дшеся, почти́м па́мять его́ пе́сньми, глаго́люще:/ ра́дуйся, о́тче, дея́ний и виде́ний у́ме соверше́нный.

И́кос:

От Небе́сных у́мных сил в Тро́ице пева́емому Всеси́льному Бо́гу моли́ся, о́тче Ефре́ме,/ от твоего́ боготе́чнаго язы́ка вод да́ти моему́ смы́слу струю́/ и просвети́ти мой ум,/ да от твои́х мно́гих исправле́ний вма́ле ти благодаре́ние принесу́/ и, воспомяну́в и́же во пло́ти жития́ твоего́, реку́:/ ра́дуйся, свяще́ннаго ко́рене Богода́нная ветвь;/ ра́дуйся, я́ко Христо́вы ра́ди любве́ роди́тельскую и сро́дников презре́л еси́./ Ра́дуйся, я́ко тле́нная ни во что же вмени́л еси́ ра́ди бу́дущия и́стинныя жи́зни;/ ра́дуйся, чистоте́ у́чителю и целому́дрия преде́ле./ Ра́дуйся, по́стников пра́вило и наста́вниче;/ ра́дуйся, виде́ний духо́вных непоползнове́нное обузда́ние./ Ра́дуйся, Правосла́вию и́стинный пропове́дниче и о́бразе;/ ра́дуйся, я́ко от е́реси к непоро́чней ве́ре мно́гих обрати́л еси́./ Ра́дуйся, я́ко архиере́йский престо́л уче́нии благочести́выми украси́л еси́;/ ра́дуйся, еретико́м сопротивобо́рче непобеди́мый./ Ра́дуйся, ни́щим и си́рым ми́лостыни пода́телю;/ ра́дуйся, всем те́плый предста́телю и моли́твенниче./ Ра́дуйся, о́тче свяще́нне, виде́ний духо́вных у́ме соверше́нный.

Пе́снь 7.

Ирмос: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Припев: Преподо́бне о́тче Ефре́ме, моли́ Бо́га о нас.

В ю́ности му́дростию, в ста́рости же ра́зумом, о́тче, богате́в,/ процвете́, я́ко фи́никс, и плоды́ духо́вныя принесе́,/ и́миже напита́в благочести́вых мно́жества, науча́еши их пе́ти:/ благослове́н Бог оте́ц на́ших.

Припев: Преподо́бне о́тче Ефре́ме, моли́ Бо́га о нас.

Се́рбское вели́кое седа́лище свои́ми му́дрыми уче́ньми украси́л еси́,/ зане́, я́ко река́ духо́вная, исхожда́ше от твои́х усте́н, напая́ющи благочести́вых,/ вку́пе же сы́ны церко́вныя науча́ющи пе́ти:/ благослове́н Бог оте́ц на́ших.

Сла́ва Отцу́ и Сы́ну и Свято́му Ду́ху:

Священноле́пно свою́ ду́шу, о́тче, от страсте́й свободи́в/ и апо́стольским уче́нием после́дуя,/ иноколе́пных мно́жества от е́ресей отврати́л еси́/ и к ве́ре Правосла́вней приве́л еси́, науча́я их вопи́ти:/ благослове́н Бог оте́ц на́ших.

И ны́не и при́сно и во ве́ки веко́в. Ами́нь.

Богородичен: Утро́бу Твою́ де́вственную, Отрокови́це, преобрази́ша в пещи́ трие́ о́троцы,/ егда́ де́вственным те́лом попра́ша пла́мень;/ Твоя́ же чи́стая ложесна́ не опали́ Огнь Боже́ственный – Иису́с Христо́с, Ему́же пое́м:/ благослове́н Бог оте́ц на́ших.

Пе́снь 8.

Ирмос: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвига́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Припев: Преподо́бне о́тче Ефре́ме, моли́ Бо́га о нас.

И до́лга твоя́ боре́ния, и кре́пкии твои́ по́двиги, твердоу́мне,/ и свяще́ннии посты́, Богоно́се, я́же му́жественне понесе́,/ к осмы́м бо равночи́сленную десяти́цу присовокупи́,/ в них же непреста́нно вопие́ши:/ Го́спода воспева́йте, дела́,/ и превозноси́те во вся ве́ки.

Припев: Преподо́бне о́тче Ефре́ме, моли́ Бо́га о нас.

Я́ко Христо́вым та́йнам досто́ин служи́тель,/ сим любе́зне причасти́лся еси́ Те́лу и Кро́ви Влады́чней, рек сло́во приснопомина́емое:/ сла́ва о всем Бо́гу в Тро́ице;/ Ему́же в ру́це свою́ ду́шу преда́л еси́, нас науча́я вопи́ти:/ Го́спода воспева́йте, дела́,/ и превозноси́те во вся ве́ки.

Сла́ва Отцу́ и Сы́ну и Свято́му Ду́ху:

Тро́ицу Пребоже́ственную во Еди́нице и Еди́ницу в Тро́ице/ воспои́м, ве́рнии, во ве́ки пребыва́ющее Ца́рство,/ и Сему́ служи́теля му́драго Ефре́ма ублажи́м,/ я́ко да, уча́щеся от него́, вопие́м:/ Го́спода воспева́йте, дела́,/ и превозноси́те во вся ве́ки.

И ны́не и при́сно и во ве́ки веко́в. Ами́нь.

Богородичен: Я́ко И́стиннаго Ма́ти Словесе́,/ мглу мои́х страсте́й разжени́/ и ума́ моего́ омраче́ние просвети́,/ да от чи́ста се́рдца Сы́ну Твоему́ вопию́:/ Го́спода воспева́йте, дела́,/ и превозноси́те во вся ве́ки.

Песнь 9

Ирмос: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Припев: Преподо́бне о́тче Ефре́ме, моли́ Бо́га о нас.

Я́ко Боже́ственное сокро́вище, честны́я твоя́ мо́щи, святи́телю блаже́нне,/ объе́мше твоя́ духо́вная ча́да с весе́лием, ку́пно же и слеза́ми,/ с ни́миже отце́в Нача́льник и па́стырем Па́стырь,/ Ему́же Са́вва тезоимени́тство, я́коже Дави́д пред киво́том, ра́достию вопие́т:/ Тебе́ велича́ем, Трисвяты́й.

Припев: Преподо́бне о́тче Ефре́ме, моли́ Бо́га о нас.

С весе́лием восприе́мши Се́рбская Це́рковь вели́кая/ святы́я твоя́ мо́щи, преподо́бне, взыва́ет, вопию́щи:/ вели́чит душа́ моя́ Го́спода,/ я́ко даде́ ми жениха́ па́стыря/ и поуче́ний неистощи́мое бога́тство.

Сла́ва Отцу́ и Сы́ну и Свято́му Ду́ху:

Я́ко вели́ко дерзнове́ние к Бо́гу стяжа́в, о́тче,/ моли́ся Ему́ о ча́дех свои́х, почита́ющих тя любо́вию по до́лгу,/ изба́витися нам от вся́ких е́ресей, и обстоя́ний, и паде́ний/ и в День су́дный лю́таго отве́та, и ве́чнаго муче́ния.

И ны́не и при́сно и во ве́ки веко́в. Ами́нь.

Богородичен: Обнища́вшее доброде́тельми се́рдце мое́, Пречи́стая Де́во,/ покажи́ плодоно́сно, Я́же от непло́дове ро́ждшаяся,/ моли́ вся Претворя́ющаго манове́нием просвети́ти ду́шу мою́,/ да пою́ Тя, Всепе́тую.

Свети́лен.

У́тро светоно́сное днесь возсия́ нам,/ му́драго святи́теля па́мять, ве́рных ду́ши веселя́щая./ Тем воспева́ем изве́дшаго всех из тьмы Христа́ Бо́га на́шего,/ Его́же пое́м со Отце́м и Ду́хом.

Сла́ва, и ны́не, Богоро́дичен:

Держа́вным Свои́м покро́вом от враго́в наве́та/ нас, Чи́стая, Твоя́ рабы́, невре́дны сохрани́,/ Тебе́ бо и́мамы Еди́ну прибе́жище в ну́ждах.

Молитва

О свяще́нная главо́, преподо́бне о́тче, преблаже́нне а́вво Ефре́ме, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.